LAOAG CITY – Inpakaammo ti maysa a kameng ti LGBTQ Community a ni alyas Marimar a residente ti Barangay Gabut Sur iti ili ti Badoc a maipagarup a dinangran isuna ni P/Capt. Elison Pasamonte, Hepe ti Badoc Municipal Police Station.
Segun kenkuana, manarimaan ti panagselponna iti ruar ti barangay hall-da idi a kellaat nga adda ti maysa a lalaki a ni Jaymar Valdez alyas Burcio ti nangitaray ti selponna gapu ta maipagarup nga agibidbidyu isuna.
Gapu iti daytoy, nagkinnamatda iti aglawlaw ti barangay hall agingga a nakitana nga inyawat ni Burcio ti selponna ken ni Catherine Tugas.
Kunana nga idi saludsudenna ni Catherine no ayanno ti selponna ket inbagana nga awan met kenkuana.
Mainaig iti daytoy, inlawlawag ni alyas Marimar nga inkabilda isuna iti maysa a kuarto iti barangay hall ket ditoy a maipagarup a pinarusukan ken dinanog isuna ni P/Capt. Pasamonte iti namindua a daras iti takiagna.
Malaksid iti daytoy, rumrummuar a pinagsawsaw-an pay isuna ti Hepe ti agkakadakes a sarita.
Inbatadna nga adda ti dua a naka-sibilian a pulis iti uneg ti kuarto a nakakita iti panangdangran ti Hepe kenkuana ngem saanda pulos a naganawa.
Inpalgakna a nagpaut isuna iti uneg ti kuarto iti agarup lima nga oras sakbay a pinalubusanda a rimmuar.
Kinunana nga adda ti uppat a Close Circuit Television wenno CCTV camera ti nakaimuntar iti barangay hall ngem mapapati a naipaiddep kadayta a gundaway.
Mamati ni alyas Marimar nga adda ti pakainaiganna iti eleksion iti napasamak kenkuana.
Innayonna a desidido a mangipila ti reklamo kontra iti Hepe ti Badoc Municipal Police Station.
Naammoan a manarimaan ti panagkampania ti maysa a grupo kadayta a gundaway ket inpagarupda nga agibidbidyu ni Marimar a supporter isuna ti bangir a grupo.
Kabayatanna, naiget a naglikudan ni P/Capt. Pasamonte ti alegasion ni Marimar kenkuana.
Inlawlawagna a saanna nga am-ammo, saanna a nakitkita ken saanna a nakasarsarita ni Marimar kadayta nga aldaw.
Nupay kasta, inadmitirna a nagturong isuna iti lugar tapno agronda ken kitaen ti mapaspasamak iti aglawlaw a saan ketdi tapno mangdangran.
Inpettengna nga awan ti karebbenganna wenno ti Philippine National Police a mangipawil ti mangala ti bidyu.
Kunana nga iti las-ud ti 17 a tawenna iti serbisio ket awan pulos ti nakairamramananna a kaso administratibo.
Innayonna nga ipaimana daytoy a banag iti abugado ti nailian a pulisia tapno ammona ti umiso nga addang wenno proseso nga aramidenna maipanggep iti daytoy.
Iti agdama, bayat a maisursurat daytoy a damag ket saan pay a naisubli ti dua a selpon ken maysa a relo ni alyas Marimar.
