LAOAG CITY – Inpasigurado ni Barangay Chairwoman Deliarina Rafael ti Barangay Bacsil ditoy siudad ti Laoag ti kinatalged ti ar-aramidenda a suka.
Daytoy ket kalpasan a maipagarup nga adda dagiti aglaklako ti suka a malalaukan ti sabali a banag a mangitund ti panagsakit ti buksit ken panagbudo ti karabukob dagiti gumatang.
Inpakaammona nga adda ti sumurok-kumurang 50 a residente iti barangayda ti agar-aramid ti suka.
Inlawlawagna nga agar-aramid pay dagiti opisial ti barangay nga isupsuplayda ti maysa a pasdek negosio ditoy siudad ken dadduma pay a probinsia.
Kunana a saanda nga agus-usar ti preservatives no di ket amin dagitoy ket natural ingredients.
Mainaig iti daytoy, inpetteng ni Kapitana Rafael a no maaladan ti tubbog ti unas ket ipapudotda ken ikabilda ti burnay no sadinno nga isu ti pangilaokanda metten ti bulong, ukis ken bunga ti samac.
Innayonna a ti 350 ml a suka ket ilako daytoy iti balor a 50 a pisos.
Kabayatanna, inpakaammo ni Barangay Chairman Jeffrey Lucaten ti Barangay Bacsil North ditoy siudad ti Laoag nga adda met ti sumurok-kumurang 50 nga aglaklako ti suka iti barangayda.
Inpasingkedna no mapaayaban isuna iti konseho ket nakasagana daytoy a dumatag nangruna ket ubing pay laeng idi ket agar-aramiddan ti suka ken awan met ti napuutanna nga adda ti mailalaok a sabali.
Maipalagip a kalikagum a paimbestigaran ti Sangguniang Panlungsod dagiti agar-aramid ti suka iti Barangay Bacsil ditoy siudad ti Laoag gapu iti maipagarup nga adda ti mailalaok iti daytoy.
