LAOAG CITY – Maluksaw ken emosyunal ni Mrs. Annie Pascua iti Barangay 6 ditoy ciudad ti Laoag iti pannakarakrak ti karinderya na babaen kadagiti dua a lallaki.
Segun kenni Pascua, iti bigat ti Sabado, Mayo 13 ket naibaga kenkuana nga ik-ikkaten ti trabahador ti maysa nga inhinyero ti bombilya rason a kinomprontar na daytoy.
Inbatad na a bimmaba met ti maseknan ngem idi inbaga ti inhinyero nga ikkaten na ti bombilya ket inuli na manen rason a napan innala ni Pascua ti cellphone na tapno maivideo ngem idi nakasublin ket naan-anayen a naikkat daytoy.
Gapo iti daytoy, napan na inpa-blotter iti barangay da ti napasamak ngem bayat nga adda iti barangay hall ket naamoan na manen nga adda ti mangub-ubor iti karinderya.
Kalpasan daytoy, kunana nga awan met ti napasamak ngem iti pasado alas-dies ti rabi ket kinita na ti cellphone na ken ditoy a naduktalana na a naminpinsanen a naperdi ti karinderya.
Inbatad na a naduktalan da a basar iti CCTV nga 6:49PM pay laeng idi rinakrak dagiti dua a saan pay a nainaganan nga indibidual.
Patien met ni Pascua a ti indibidual a nangikkat iti bombilya ti karinderya na ket isu met laeng ti nangrakrak iti daytoy.
Mainaig iti daytoy, kuna ni Pascua a daytoyen ti maikatlo a gundaway nga adda ti nangrakrak iti karinderya na no sadinno ti ummuna ket ti comfort room idinto a ti maikadua ket ti kusina ken ti pipe ti danom ken naduktalan a nakikir ngem awan ti pammaneknek agingga a nagpaimuntar ti CCTV.
Mamati a ti rason no apay a mapaspasamak daytoy ket ti kalikagom a mapapanaw isuna nangruna ket saan na a kukua ti daga ngem nakakontrata iti agtagikua.
Iti agdama, inpakammo ni Pascua a saan nan nga ituloy ti agnegosyo iti nasao a paset ti lugar gapo iti trauma na.
Kabayatanna, kuna ni Barangay Chairman Dionicio Guillermo Jr, iti nasao a barangay nga idi nakita dan a mismo ti nagbaganan ti karinderya ni Pascua ket timmawag dan a dagus iti Philippine National Police.
Innayon na a saan na a malasin no siasinno dagiti indibidual a nangrakrak iti karinderya na.
Innayon na nga agpatulong dan iti Philippine National Police ti nasao nga insidente para iti pannakasolbar daytoy.
