LAOAG CITY – Inbatad ti Department of Health a ngimmato ti kaso ti leptospirosis iti pagilian iti umuna a kwarter ti 2026.
Iti datos, rumrumuar a manipod Enero 4 agingga iti Hunyo 6, 2026 ket nakairekord ti 2,177 a kaso ti leptospirosis wenno ngimmato ti 6% no ikumpara iti napalabas a tawen nga addaan ti 2,046 a kaso laeng iti kapada a panawen.
Basar pay iti datos, kaadoan kadagiti agsaksakit ket dagiti mannalon ken dagiti masansan a maiyuper iti pitak wenno layos.
Inbalakad ti ahensya a no saan a maliklikan ti lumasat iti layos ket masapol nga agsuot ti bota aglalo no adda ti sugat ti saka, ugasan a dagus ti nadalos a danom ken sabonan a nasayaat ti paset ti bagi a naiyuper iti danom.
Kangrunaan ti amin ket saan nga agpangadua a mapan agpakonsultar iti doktor no makapasar kadagiti sintomas ti sakit a leptospirosis.
