LAOAG CITY – Inpetteng ni House Impeachment Lead Prosecutor ken Batangas Rep. Gerville Luistro a mailabsing iti Konstitusion ti kiddaw ni Senador Alan Peter Cayetano a maaddaan ti “interim Senate administration.”
Inbatadna a basar iti Konstitusion ket saan a mabalin ti dua a Presidente ken dua a Secretary iti Senado ken dua a clerk of court para iti Impeachment Court.
Mensahe daytoy ni Luistro iti baet ti agtultuloy a krisis iti liderato ti Senado kabayatan nga umas-asideg ti naikeddeng a pre-trial inton Hunio 18 mainaig iti sangsangoen nga impeachment case ni Vice President Sara Duterte.
Kuna ni Luistro, asino man ti Presidente ti Senado ket nasken a matuloy ti impeachment trial ni Vice President Duterte a naikeddeng a mangrugi inton Hulio 6.
