LAOAG CITY – Naduktalan iti panagadal a dagiti tattao a nakurang ti in-inumen na a danom iti kada aldaw ket makapaspasar ti nakaro a sintomas ti stress.
Basar kadagiti agsuksukisok iti Liverpool John Moores University, nadiskubre da a dagiti indibidual a nababa ti ipapauneg da a fluid iti kada aldaw ket agiparukpat ti nangato a lebel ti cortisol, ti maibilang kas kangrunaan nga stress hormone ti bagi ti tao.
Gapu iti daytoy, inbalakad dagiti agsuksukisok nga uray saan a makain-inom ket masapol nga ugalien ti uminom ti danom.
Mainaig iti daytoy, nagballaag ni Neil Walsh manipod iti School of Sport and Exercise Sciences iti nasao nga unibersidad a ti panangiparuk-at ti nangato unay a lebel ti cortisol ket possible a mangitunda ti napaot a risgo iti salun-at, karaman ditoy ti heart disease, diabetes, ken depresyon.
