LAOAG CITY – Natay ti dua nga indibidual ken maysa ti manarimaan a matamtaming iti ospital kalpasan a nagbaliktad ti naglugananda a kotse iti paset ti bypass road iti Brgy. Puyopuyan iti ili ti Pasuquin.
Segun ken ni P/Maj. Jonevale Maramag, Hepe ti Pasuquin Municipal Police Station, dagiti nakalugan iti kotse ket agtawen ti 20, 23 ken 25 nga agpapada a residente dagitoy ditoy siudad ti Laoag.
Inbatadna a basar iti inwayatda nga imbestigasion, kabayatan a dumaldalyasat ti kotse nga agturong nga agpa-abagatan ket kellaat a napukawan ti kontrol ti manibela ti driver iti kurbaan a paset ti kalsada.
Gapu iti daytoy, inpalgakna a nagbaliktad ti kotse agingga a timmama pay iti poste ti silaw a nangitunda ti panagsagabada ti nakana a sugat iti ulo ken nagduduma a paset ti bagida.
Inlawlawagna a saan a naka-seat belt dagiti tallo a nakalugan ken napaspas ti taray ti kotse idi napasamak ti desgrasia.
Kunana a mapapati a nabartek dagiti maseknan a biktima ken adda dagiti naalada a bote ti arak iti uneg ti kotse.
Kabayatanna, naammoan a pimmusay dagiti dua a nakalugan iti passenger seat ken iti likod ti kotse idinto a manarimaan a maag-agasan ti driver iti ospital.
