LAOAG CITY – Manamnama a sumango iti kaso a kriminal ti maysa a lalaki kalpasan a nagpaputok ti paltog iti Brgy. Caribcb iti ili ti Banna idi Enero 1, 2025.
Binigbig ti Banna Municipal Police Station ti lalaki a ni John Mark Ranga, adda iti umno a tawen ken residente iti nasao a lugar.
Basar iti imbestigason, maipagarup a nagpaputok iti namin-dua a daras ti lalaki nga inturong na iti kanal idinto a nagtalimpugaw daytoy a nagpa-daya iti nasao a lugar.
Mainaig iti daytoy, natiliw ti suspek iti pagtaenganna babaen iti hot pursuit operation ken nakarekobre dagiti otoridad ti maysa a 22 caliber (magnum) revolver nga addaan ti serial number ken markings a Made in Germany.
Kabayatanna, nagtalinaed ti suspek iti kuerpo ti Banna Municipal Police Station gapu ta awan ti maipakita a dokumento maipapan iti panagikot na ti nadakamat a paltog.
