LAOAG CITY – Maysa nga agtawen ti 29 a chess player manipod idiay Lagos, Nigeria ti awan sardayna nga agay-ayam ti chess iti uneg ti dua nga aldaw ket kagudua. Daytoy ket tapno makairekord isuna ti baro a world record iti titulo a “Longest Chess Marathon.”
Ni Tunde Onakoya, maysa a chess champion ken child education advocate ket agdama a nakabase idiay New York.
Inaramidna ti world record attempt tapno makaukkon ti $1 million nga usarenna iti panagtulong kadagiti pagadalan idiay Africa.
Naiyuswat ti world record attempt iti Times Square idiay New York City kaduana ti maysa pay a chess champion a ni Shawn Martinez kas kabinnalubalna. Nangrugi ti chess marathon iti alas diyes idi Abril 17.
Iti kada maysa nga oras a panagay-ayam da Onakoya ken Martinez, palpalubusan isuda ti Guinness organization a maaddaan ti break time a lima a minuto. Mabalinda nga urnungen ti break time-da tapno usaren daytoy iti naat-atiddog a panaginana.
Nagatendar iti record attempt dagiti sumagmamano a Nigerian nationals kas witnesses ken tapno maipaayan ti suporta ti kailianda a ni Onakoya.
Ti immuna a plano ni Onakoya ket 58 nga oras laeng ti goal record-na ngem intultuloyna daytoyen agingga iti 60 nga oras.
Kalpasan ti 60 nga oras, naartapan ni Onakoya ti previous record holder nga isuda Hallvard Haug Flatebø ken Sjur Ferkingstad ti Norway nga addaan ti 56 nga oras a record time ken kalpasan ti record attempt ket nakaukkon ni Onakoya ti $22,000 para iti charity daytoy.
Iti agdama, iyur-uray pay ni Onakoya ti kumpirmasion ti Guinness gapu ta manarimaan pay laeng ti panangberipikar ti records keeping organization dagiti naisubmitir a pammaneknek iti naisayangkat a record attempt.
