LAOAG CITY – Naarestar ti maysa a lalaki kalpasan a maipagarup a pinaltoganna ti maysa a construction worker iti Barangay Gabut Norte iti ili ti Badoc.
Ti biktima ket agtawen ti 30, awanan asawa idinto a ti suspek ket agtawen ti 20, awanan asawa, awanan trabaho ken agpada dagitoy a residente iti nasao a barangay.
Basar iti Badoc Municipal Police Station, kabayatan nga agtugtugaw ti biktima iti monoblock iti sango ti pagtaenganda ket kellaat nga immasideg ti suspek ken maipagarup a nagpaputok ti paltog ti sumagmamano a daras.
Nupay kasta, saan a natamaan ti biktima ken insigida met a naglibas ti suspek iti saan a masinunuo a direksion iggemna ti inusarna a paltog ngem natiliw met laeng daytoy iti naiwayat nga hot pursuit operation dagiti otoridad iti pagtaengan ti karrubana.
Mainaig iti daytoy, adda ti abbong iti rupa ti suspek idi napasamak ti krimen usar ti nalabbaga a bado ngem nalasin latta ti biktima ti suspek.
Narekobre dagiti otoridad ti dua a a fired bullet ken maysa a deformed fired bullet iti saan pay a masinunuo a klase ti paltog.
Naiturong ti biktima iti Rural Health Unit iti ili ti Badoc para iti medical examination.
Inbatad ti biktima nga agarup 11:40 ti rabii idi Hunio 26, napan ti suspek iti pagtaenganda ken maipagarup a nagpaputok ti paltog iti namindua a daras.
Kabayatanna, rumrummuar iti imbestigasion dagiti otoridad a ti motibo ti suspek ket gapu iti dati a susikda iti biktima.
