LAOAG CITY – Inlawlawag ni Police Lt. Roi Manuel Ordonio, chief of police ti PNP-Pasuquin a ti lalaki a nagpositibo iti Uk variant ti covid-19 ket saan pay a nakadanon iti nasao nga ili.
Segun kenni Ordonio, naideretso iti Provincial Quarantine Facility iti Barangay Mangato ditoy ciudad ti Laoag.
Rumrumwar a ti pasyente ket naggapo idiay pagilyan a Bahrain.
Mainaig iti daytoy, kunana nga itay parbangon ket timmawag ti Provincial Health Office kenkuana a mangipakpakammo nga adda ti nagpositibo iti UK variant.
Kunana a ti nangsukon iti pasyente iti border control iti ili ti Badoc ket ti RHU ken MDRRMC ngem inderetso da iti Provincial Quarantine Facility kalpasan a naamoan da a positibo daytoy iti nasao a variant ti covid.
Nupay kasta, kunana nga adda ti LSI a taga Barangay Binsang iti nasao nga ili a nakaluganan ti pasyente ngem dagus met laeng a nai-quarantine ken nakalockdown ti Barangay Health Unit ken 500 meter radius daytoy.
Inbatad na nga agpatingga it third degree contact ti LSI ket naka-quarantine pakairamanan dagiti opisyales iti barangay nga isu ti nagbantay basar iti protocol ken advice ti RHU ken PHO.
Inpasigurado na met a saan pay a nakaawid iti pagtaengan da ti LSI ken manamnama nga intono bigat ket dumalan iti swab test.
