LAOAG CITY – Naarestar manen ni Angelica Joyce Nacino, agtawen ti 22, balasang, awanan ti trabaho ken residente iti Brgy. San Isidro, Pasuquin, Ilocos Norte gapu iti kaso nga estafa.
Daytoy ket babaen ti bileg ti warrant of arrest nga inparuk-at ni Hon. Jonathan A. Asuncion, Presiding Judge, First Judicial Region, MTCC Branch 2, Laoag City, Ilocos Norte.
Ti pannakatiliw ni Nacino ket nagbibinnuligan nga inpatungpal ti Burgos MPS, RMFB1 101st MC ken ti 3rd Platoon ti Ilocos Norte PMFC Caruan.
Ni Nacino ti maitudtudo a lider ti P2P Investment Scam ditoy probinsya.
Nairekomendar ti 72 a ribo a pisos a piyansa ni Nacino para iti temporaryo a pannakawaya-waya na.
Kabayatanna, iti eksklusibo nga interview ti Bombo Radyo Laoag ken ni Nacino, inbatad na a ninamnama na ti pannaka-arestar na manen.
Innayon na a nakasagana a mangsango kadagiti kaso a naipila kontra kenkuana, ngem mangnamnama a maudi daytoyen.
Nupay kasta, inbatad ni Nacino a pilaan na met ti reklamo dagiti ibilang na nga ad-adda a nabenepisyaran ti P2P Investment Scam.
Maipalagip nga immuna a naarestar ni Nacino itay laeng napan a tawen gapu met laeng iti nasao a reklamo.
