LAOAG CITY – Natiliw ti lima a lallaki gapu iti illegal a panagsusugal da iti maysa a minatayan iti Brgy. Mabusag Sur iti ili ti Badoc.
Daytoy ti inpakaammo ni Police Major Joseph Tayaban, ti chief of police iti ili ti Badoc.
Inbaga ni Tayaban a maysa kadagiti suspek ket namintallon a daras a natiliw gapu iti illegal a panagsugal ken nagbalin pay a subject daytoy iti search warrant operation kalpasan a nagpap-paputok ti paltog.
Kuna ti opisyal a naka-probation ti nasao a suspek ngem gapu kadagiti nakairamanan na manen a kaso ket nasuspenso ti aplikasyon na para iti probation.
Inlawlawag ni Tayaban nga idi naireport kadakuada ti kaadda dagiti agsusugal iti minatayan ket napan da binallaagan nga immuna dagitoy, ngem gapu ta intultuloy da latta ti illegal nga aktibidad da ket nangiwayat dan ti operasyon a nakatiliwan da kadagiti lima a suspek.
Nakumpiskar da iti lugar ti nasurok a siyam a ribo a pisos a maipagarop a taya dagiti suspek.
Gapu iti daytoy, inbaga ni Tayaban nga inpilaan da dagiti suspek ti reklamo a panaglabsing iti Republic Act (RA) 11332 wenno “Mandatory Reporting of Notifiable Diseases and Health Events of Public Health Concern Act gapu iti saan da a panagusar ti facemask ken awan ti social distancing.
Inpakaammo ni Tayaban a nakapagpiyansa dagiti dua a suspek iti sag-30 ribo a pisos para iti temporaryo a pannakawaya-waya da idinto a dagiti tallo ket nagtalinaed da iti pagbaludan.
Mainaig iti daytoy, inbaga ni Tayaban a basar iti imbestigasyon da ket pawpawilan dagiti nagmintay nga agsusugal dagiti suspek ngem maipagarop a saanda nga inkaskaso dagitoy.
