LAOAG CITY – Napilaanen ti kaso a panagsalungasing iti Republic Act 9165 wenno Comprehensive Dangerous Drugs Act of 2002 dagiti lima nga indibidual a naarestar babaen iti Anti-Illegal Drug Buy-Bust Operation.
Mainaig iti daytoy, immunan a nangipilan ti Philippine National Police iti ili ti Banna ken Philippine National Police iti ili ti Solsona ti kaso kadagiti dua a suspek ti nadakamat nga operasion no sadinno a nakakumpiskarda ti 2.5 grams a shabu ken paltog a calibre 38 nga addaan ti uppat a bala.
Segun ken ni P/Maj Sheryl Guzman, pannakangiwat ti Ilocos Norte Police Provincial Office, naipila ti kaso a panagsalungasing iti Republic Act 9165 iti suspek nga agtawen ti 54 ken residente iti ili ti Pinili no sadinno nakakumpiskar dagiti otoridad ti 1 gramo a maattap a shabu nga addaan ti street value a P6,800.
Kinuna ni Guzman a dagiti ag-live in partner a naarestar iti naisayangkat nga operasion iti ili ti San Nicolas ket napilaanen ti kaso no sadinno ti suspek a lalaki ket napilaan ti dua kaso babaen iti Republic Act 10591 wenno panagikot ti paltog.
Iti agdama, adda pay laeng ti nadakamat a suspek iti balay pagagasan gapu ta nasagaba daytoy ti sugat kalpasan a limmaban kadagiti pulis a nangiwayat iti nadakamat nga operasion.
Nupay kasta, adda dagiti kameng ti Philippine National Police iti ili San Nicolas nga agbanbantay iti nadakamat a suspek.
