LAOAG CITY – Naipatungpal ti local emergency curfew iti Los Angeles, California iti baet ti nalawa a tignay protesta.
Segun ken ni Los Angeles Mayor Karen Bass, nagbalin nga epektibo ti curfew manipod iti oras ti alas-8:00 idi rabii agingga iti alas-6:00 ti bigat, oras iti Amerika, ken namnamaen a maipatungpal daytoy kadagiti sumarsaruno pay nga aldaw.
Inpakaammo ni Los Angeles Police Department Chief Jim Mcdonnell, addan ti 378 a tattao ti naarestar iti napalabas nga uppat nga aldaw a nalawa a tignay protesta, karaman ditoy ti agarop 200 nga indibidwal a naarestar idi laeng Martes.
Inreport pay ti Mayor nga adda ti 23 a business building ti natakawan iti napalabas nga uppat nga aldaw.
Kabayatanna, nagkedkedan met ti federal judge ti request ti California para iti dagus a restraining order tapno temporaryo a pannakaipawil ken ni US President Donald Trump nga agusar ti Marines ken National Guard iti pannakaipatungpal dagiti linteg iti estado kangrunaan na ket adda ti pakainaigan iti inisyatiba na para iti massive deportation dagiti iligal nga imigrante.
In-schedule met ni Senior US District Judge Charles Breyer ti panagdengngeg iti daytoy ita nga aldaw.
Immunan nga indeploy ni Trump ti National Guard ken Marines tapno protehiran ti federal personnel ken property kontra kadagiti demonstrador a manglaplapped kadagiti maiyuswat a raid kontra kadagiti imigrante iti ciudad.
