LAOAG CITY – Saanen a lugan ti Ilocos Norte Water District (INWD) ditoy ciudad ti Laoag ti nakita a nakaparada iti maysa a galyeraan iti ili ti San Nicolas.
Daytoy ti pinasingkedan ni Mr. John Teodoro, General Manager ti INWD.
Inbatad na a nasuruken a maysa a tawen a nailako da ti nasao a lugan ken possible a ti nakagatang ti adda iti galyeraan.
Inlawlawag na a dagiti ilaklako da a lugan ket unserviceable ken makaammon dagiti gumatang a mangpatarimaan ken mangirehistro.
Kabayatanna, immapela ni Teodoro iti publiko a no adda ti makitkita da a lugan ti INWD kadagiti lugar a saan a maiparbeng a pagturungan dagiti empleado ti gobierno ket itawag da laeng kenkuana sakbay nga ipost da iti social media.
