LAOAG CITY – Ibilang ni Ms. Kristine Garduque a tubo ili ti San Nicolas a dakkel a pannubok iti maysa nga anak a maawan iti denna ti nagannak kenkuana.
Segun kenkuana, nasapa a napukawan isuna ti ayat ti maysa a nagannak gapu ta nagsaruno dagitoy a pimmusay.
Inbatadna a dakkel a karit kenkuana nga awanen iti sibayna dagiti nagannak kenkuana a pangal-alaanna ti kired ken pigsa iti inaldaw-aldaw.
Nupay kasta, inlawlawagna a saan man a kaskarina a naawatna ti pannakatay dagiti nagannakna ngem nagbalin daytoy nga inspirasion tapno saan nga agsardeng a gun-oden ti araapna iti panagbiag.
Kunana nagpanunot isuna ken dagiti pagayamna a mangipasdek ti negosioda a milk tea shop ditoy siudad ti Laoag a kangrunaan a paggugusto dagiti ubbing ken agtutubo ita nga henerasion.
Inpakaammona a babaen ti anus ken sakripisio ket nagbunga ti bannogda nga agpapagayam a nagtitinnulong tapno mapadur-as ti negosioda.
Innayonna a sadinoman iti agdama dagiti nagannak kenkuana ket sigurado isuna a naragsak ken naisem a mangbuybuya kenkuana kabayatan nga in-inot a maragragpatna dagiti arapaapna.
