LAOAG CITY – Dumanon iti sumurok maysa a milyon a pisos ti balor ti nadadael iti pannakauram iti maikadua a kadsaaran ti maysa a pagtaengan iti Brgy. Abaca iti ili ti Bangui.
Segun ken ni Senior Fire Officer 4 Alvin Andres, ti Municipal Fire Marshal iti nasao nga ili, basar iti pannakisarsaritada ken ni Ms. Marycris Cocson nga agtagikua iti nauram a pagtaengan nga adu kadagiti kagamitanda ti dimmapo pakairamanan dagiti napateg ken nabalor a ramitda.
Inbatadna nga alisto a nagramram ti apoy iti paset ti kusina iti maikadua a kadsaaran ti nasao a pagtaengan a rason nga awan ti naisalbar ti maseknan a pamilia.
Kunana a nagpaut ti maysa nga oras iti panagsebsebda ti apoy sakbay nga indeklarada a fire out iti nasao nga uram.
Innayonna a temporario pay laeng nga agnanaed ti maseknan a pamilia iti pagtaengan ti kabagianda gapu iti napasamak nga uram.
Kabayatanna, agtultuloy pay laeng ti naun-uneg nga imbestigasion dagiti otoridad maipapan iti namunganayan ti uram.
Maipalagip a dagus a nagresponde ti Bureau of Fire Protection iti ili ti Bangui iti nauram a pagtaengan kalpasan nga inpakaammo kadakuada ti maysa a tricycle driver maipanggep iti insidente.
