LAOAG CITY – Inlungalong ni Senador Loren Legarda ti maikapito nga Anti-Political Dynasty Bill a mangipawpawil iti aggigiddan ken agsasaruno a panagserbi dagiti agkakabagian iti gobierno.
Iti Senate Bill 1854, ilunglungalong ni Legarda a pawilan nga agkandidato wenno agiggem ti aniaman nga elective office ti asinoman a tumaray a mangitunda daytoy ti political dynasty.
Maipakat daytoy agingga iti second degree of consanguinity wenno affinity, lehitimo ken saan a lehitimo, ken iti legally adopted.
Basar iti New Civil Code of the Philippines, adda iti second degree ti nagannak ken anak, asawa ti anak, kabsat, lolo, lola ken apoko.
Nakailanad iti gakat nga adda ti bileg ti Commission on Elections (COMELEC) a kanselaren ti Certificate of Candidacy ti maysa a kandidato a maduktalan nga addaan ti political dynasty relationship.
