LAOAG CITY – Kinumpirmaran ti Infectious Disease Expert a ni Dr. Rontgene Solante a nakairekod metten ditoy Pilipinas ti makapatay a bacterial infection nga streptococcal toxic shock syndrome (STSS) nga agraira ita idiay Japan.
Segun ken ni Dr. Solante, ti sakit ket gubuay iti gagangay a bacteria a mangitunda ti pharyngitis wenno panagmaga ti pharynx ngem mabalin nga agresulta iti saan a gagangay ken nakaro a komplikasion no daytoy ket agwaras iti pagnaan ti dara.
Inlawlawag ti eksperto a mangrugi ti nasao nga impeksion iti kudil nga addaan ti sugat a pagserrekan ti mikrobio agingga nga agturong iti dara a makaapektar iti sistema ti sibubukel a bagi isu a napeggad ti nadakamat a bacteria nga alisto pay nga agwaras iti bagi.
Dinakamat ni Solante nga addaan ti 30% a mortality rate daytoy a kayatna a saoen a mabalin a matay iti uneg ti 24 nga oras ti maysa a naimpeksion nga indibidual kalpasan a mangrugi a makita dagiti sintomas.
Sumagmamano kadagiti sintomas daytoy ket gurigor, panagsakit ti bagi, panag-vomit ken panagngisit ti sugat a mabalin a mangitunda ti nababa a blood pressure ken narigat a panaganges.
Masansan a kangrunaan a karaman dagiti indibidual ket dagiti adda ti nakapsot nga immune system pakairamanan dagiti natataengan ken addaan ti diabetes ken chronic renal failure.
Basar iti clinical experience, inbatad ni Dr. Solante a sumagmamano a kaso ti nasao a syndrome ti na-detect iti pagilian idinto nga idiay Japan ket dimmanonen iti 900 agingga 1,000 a kaso gapu ta alisto daytoy nga agwaras.
Mainaig iti daytoy, inabisoan ti eksperto ti publiko nga agisuot ti face mask ken ugasan a naimbag ti sugat no bilang adda idinto dagiti makapaspasar met ti sintomas ti sakit ket nasken a dagus nga agpakonsultar iti doktor tapno mataming nga insigida.
