LAOAG CITY – Respetaren ti Malakanyang ti nagbalin a desisyon ti kababaan a pagpandayan linteg iti kongreso mainaig kadagiti impeachment complaint a naipila kontra ken ni Presidente Ferdinand R. Marcos Jr.
Daytoy ti inbatad ni Presidential Communications Office (PCO) Undersecretary ken Palace Press Officer Claire Castro, kalpasan a naideklarar kas ‘sufficient in form’ ti dua nga impeachment complaint iti naiyuswat a panagdengngeg ti House Committee on Justice.
Kuna pay ni Castro nga idi damo a mairakurak ti possible a pannakaipila ti impeachment complaint ken inpasigurado ni Presidente Marcos nga awan ti pagbanagan ti reklamo kontra kenkuana gapu ta ammo na nga awan ti inaramid na a madi, awan ti linabsing na iti linteg ken awan ti inaramid na nga impeachable offense.
Kabayatanna, inpetteng ni Castro a ti pakadanagan laeng ni Presidente Marcos ket ti possible nga epekto ti impeachment proceedings iti ekonomiya ti pagilian kalpasan ti nagbalin a ballaag ti maysa nga agpanpanday linteg a mabalin nga agserbi a senyales ti political instability iti international community dagitoy nga addang.
Kagiddan iti pannagna ti impeachment kontra iti presidente, naipila met ti dua nga impeachment complaint kontra ken ni Vice President Sara Duterte.
Inpaganetget met ti Malakanyang nga awan ti ammo da iti panagpila dagiti reklamo ken ipabus-oy da laengen iti kongreso ti agbalin a pagbanagan ti impeachment proceedings.
