LAOAG CITY – Ginutigot ni Engr. Maria Teresa Bacnat, Officer In Charge ti Provincial Agriculture Office dagiti mannalon ditoy probinsia a mangala ti insurance kadagiti mulada kagiddan iti panawen ti panagtutudo.
Mainaig iti daytoy, inbatadna a napagnumoanda iti Philippine Crop Insurance Corporation wenno PCIC a mangisayangkat dagitoy ti “mobile insurance” a dagitoyen ti agturong kadagiti barangay tapno danunenda dagiti mannalon kaduada dagiti agricultural technicians dagiti Local Government Units tapno maiyasideg ti nasao a serbisio.
Inlawlawagna nga inyuswatda ti nasao a tignay gapu ta maobserbaranda nga adu dagiti mannalon a gapu iti kaadu dagiti trabahoda ket masulit dagitoy a mapan mangipa-insure kadagiti mulada.
Innayon ni Bacnat nga iti babaen ti pannakibinnuligda iti Philippine Crop Insurance Corporation ket immadu met laengen dagiti mannalon a mangiparehistro kadagiti mulada iti Philippine Crop Insurance Corporation.
Maipalagip a mismo a ni Gob. Matthew Marcos Manotoc ti nanggutigot iti Provincial Agriculture Office a mangtulong kadagiti mannalon a mangiparehistro kadagiti mula ken tarakenda iti Philippine Crop Insurance Corporation.
