LAOAG CITY – Inlawlawag ni Ms. Elma Irapta, mangidadaulo ti Provincial Nutrition Action Office ti rason iti panangiramanda kadagiti masikog nga indibidual iti feeding program ket tapno maipababa ti kaso ti stunting wenno bansot ditoy probinsia.
Daytoy ti inrakurakna kalpasan a saanda laeng nga ilimitar kadagiti ubbing ti mabenepisiaran iti feeding program.
Inbatadna a maysa kadagiti epektibo nga aramiden tapno malapda ti panagbalin a bansot ti maysa nga indibidual ket babaen iti panangirugi iti panangipaay iti naan-anay a nutrision kabayatan nga adda pay laeng ti ubing iti sikog ti inana.
Inlawlawagna a no maiyanak ii maysa a tao a bansot ket awanen iti maaramidan tapno masolusionan daytoy.
Nupay kasta, inpalgakna a babaen iti feeding program kas maysa a preventive measure ket maliklikan dagiti posible a risgo a mapasaran ti maysa a tao kabayatan iti panagsikogna.
Innayonna a dumanon iti sumurok-kumurang 200 a masikog ditoy probinsia ti mabenepisiaran iti nasao a feeding program.
Maipalagip nga idi tawen 2023, dumanon iti 4.6% ti bilang dagiti makapaspasar ti stunting ditoy probinsia no sadino kaadduan kadagitoy ket manipud iti ili ti Paoay, Pinili, Currimao, Dingras ken Bacarra.
