LAOAG CITY – Inlawlawag ni Mrs. Ruby Ann Bunalade, City Planning and Development Officer ditoy ciudad ti Laoag a masapol a maala ti opinyon ti Human Resource Officer iti posible a panagbaliw ti line-up dagiti empleado ti merkado publiko ken slaughter house.
Daytoy ket kalpasan a plano ti lokal a gobierno a manayunan ti maysa pay a meat inspector ti ciudad gapo ta awan pay ti day-off dagiti empleado ti slaughter house.
Segun met kenni Mrs. Cydel Antonio, OIC iti slaughter house a tallo ti meat inspector ngem ti maysa ket adda iti merkado publiko tapno makita no adda ti dokumento dagiti karne a maiserrek.
Kuna pay ni Antonio a masapol pay ti meat inspector iti tiendaan gapo ta backyard slaughter laeng ti mapaspasamak kadagiti karne ti manok isut gapo na a nasken a makita ti kalidad dagitoy.
Mainaig iti daytoy, inbatad met ni Bunalade a mabalin a mangaramid ti baro a posisyon ti slaughter house ken maidesignar daytoy iti merkado publiko.
Inlungalong met ni Vice Mayor Vicentito Lazo a maikkat ti dua a bakante a market inspector ti tiendaan ken adda ti maestablisar a Meat Inspector I a posisyon.
Gapo iti daytoy, manamnama a mapaayaban ti Human Resource Officer iti budget hearing tapno malawlawagan daytoy a banag.
