LAOAG CITY – Inpasigurado ni Mayor James Bryan Alcid ditoy siudad ti Laoag nga awanen dagiti panagtedted ti danum kadagiti opisina wenno pasilidad iti Laoag City Hall apaman a matapugan ti panawen ti panagtutudo.
Segun kenkuana, makita nga adun dagiti nagbaliwan ti City Hall gapu ta sumagmamano kadagiti pasilidad ken opisina ket naiplastar ken napabaro.
Inbatadna a ti Laoag City Hall ket maikadua a balay dagiti mangmangged iti siudad nga isut gapuna a maipangpangruna ti kinatalgedda babaen ti pannakatarimaan ti pasilidad.
Mainaig iti daytoy, kuna ni Mayor Alcid a natarimaanen dagiti agub-ubo a paset ti City Hall no sadinno ket awanen dagiti makita pay nga agubo nga opisina wenno pasilidad.
Gapu iti daytoy, mamati ni Mayor Alcid nga ad-adda a napinpintas a serbisio ti maipaay kadagiti umili no naurnos, naplastar ken nadalus ti maysa a pasdek ken opisina.
Kabayatanna, inpanamnama pay ni Mayor Alcid ti agtultuloy a pannaka-disinfect dagiti amin nga opisina iti Laoag City pakairamanan ti pannakaiyuswat ti fumigation kadagiti barangay ditoy siudad tapno masigurado ti kinatalged dagiti residente.
