LAOAG CITY – Inlawlawag ni Mayor Joseph De Lara iti ili ti Solsona nga awan ti maris pulitikana ti panangikkatna iti maysa a Barangay Kagawad nga agbalin a benepisiario iti Ayuda para sa Kapos ang Kita Program wenno AKAP.
Segun kenkuana, sinurotna laeng ti naiyatnag a pagalagadan nga inted ti Department of Social Welfare and Development (DSWD) no sadinno a saan a kualipikado a mairaman iti nasao a programa dagiti opisial ti barangay, kabagian dagiti opisial ti barangay ken nakaawaten ti tulong iti sabali a programa ti gobierno.
Inbatadna nga adda ti 500 nga slots para iti Ayuda para sa Kapos ang Kita Program a manamnama a makaawat ti lima a ribu a pisos.
Kunana a masapol laeng a matingiting a naimbag dagiti agbalin a benepisiario iti nasao a programa tapno maipasigurado a kualipikado met laeng dagitoy.
Mainaig iti daytoy, inpakaammo ni Mayor De Lara nga inton Setiembre 11 ti pannakaiyuswat ti pay out para kadagiti kualipikado a benepisiario ti Ayuda para sa Kapos ang Kita Program.
Innayonna a babaen iti nasao a programa ket matulungan dagiti babassit a negosiante a manayunan ti puunan dagitoy ken dumur-as ti negosioda.
