LAOAG CITY – Nagkedked ni Mayor Benjamin Magalong iti imbestigasion ti Senado iti maanomalya a flood control projects ken dadduma pay a proyekto ti gobierno a naikeddeng koma ita nga aldaw, Septiembre 8.
Inbatadna a kaykayatna pay laeng nga umuna a sumango iti Kamara ken dakamaten dagiti saan pay a nabigbig nga agpanpanday linteg a nakaala ti kickback manipud kadagiti nasao a proyekto.
Iti agdama, saan pay nga inimbitaran ti House infrastructure committee ti Mayor tapno agatendar iti panagdengngeg daytoy.
Maipalagip a ni Magalong, maysa retired police general, idi pay 2022 a nakilaban kadagiti sumagmamano nga agpanpanday linteg idi babalawenna ti institutional graft para iti dakkel nga utang ti pagilian.
Kinaritna dagiti kongresista ken senador a mangidatag ti ebidensia a sumagmamano kadagiti kaduada ket nakaala ti kickback manipud kadagiti proyekto.
Immunan nga inpanawagan ni Magalong ti third party investigation nga imbes nga in-house review panels.
Kabayatanna, rimmuar ti naganna nga agbalin a paset ti independent body iti baet nga immunan nga inrekomendarna a nasken a dagiti retired police investigators ken mahistrado ti mangidaulo iti daytoy.
