LAOAG CITY – Maladingitan ni Mayor Remigio Medrano iti ili ti Sarrat ti kaadda ti 3 a nagpositibo ti COVID-19 iti nadakamat nga ili.
Dagitoy ket da IN-C235, IN-C358 ken IN-C359.
Segun kenkuana, manarimaan a dukduktalenda no siasino ti nakapulapol ni IN-C235 agsipod ta natawngan daytoyen ken saan a rumrumuar ngem posible a ti kapamilyana met laeng a masansan nga agpalpaLaoag iti posible a nakaalaanna ti virus.
Inbatadna nga adu dagiti napanan ni IN-C359 kas iti sleepover, dungaw ken birthday party sakbay a naduktalan a nagpositibo daytoy.
Iti agdama ket nakalockdown iti Purok 4 iti Barangay 17, San Felipe; Purok 4 iti Barangay 18, San Isidro; Sitio 3 iti Barangay 13, San Pedro; Sitio 3-B, ken Sitio 5 iti Barangay 16, Sto. Santiago.
Gapu iti daytoy ket inmandar ni Mayor Medrano ti pannakaipawil ti Social Gathering iti nasursurok ngem 10 a katao.
Kabayatanna, mangnamnama ti mayor a negatibo ti resulta dagiti primary contact dagiti nagpositibo ken saanen a manayonan pay ti kaso ti COVID iti nadakamat nga ili.
