LAOAG CITY – Kinumpirmaran ni Police Lt. Reycar Almazan, ti chief of police ti PNP-Pinili a pimmusay ti maysa a mangisursuro a biktima ti napasamak a pammagkong iti nasao nga ili.
Binigbig na ti biktima a ni Oscar Corpuz y Dumrique, agtawen ti 44, mangisursuro iti Pinili National High School, tubo iti ili ti Solsona ken agnanaed iti Barangay Darat.
Iti imbetsigasyon da, agnanaed ni Corpuz iti parlor ken carinderia na ken idi agarop 11:30 idi rabii ket adda ti pinastrek na a lalaki.
Kalpasan daytoy, rimwar ti biktima ken napan nagpaarayat iti sango ti pagtaengan da Barangay Kagawad Arzadon ken ditoy a natulid.
Segun kenni Almazan, nagsagaba ti biktima ti maysa a bagkong iti sango ken tallo iti likod na no sadinno ket naibati pay ti kutsilyo nga agatiddog ti 5 inches iti bagi ni Corpuz.
Inbatad na a ti maysa a kitkitaen da a motibo ket ti kinariri ti biktima a maysa met laeng a trabahador na.
Mainaig iti daytoy, kuna ni Almazan a ti cellphone ti biktima ket saan na a malukatan tapno kuma makaala da ti impormasyon iti daytoy kas iti conversation da iti naudi a pinastrek na iti parlor na.
Saan met a makumpirmaran ni Almazan no ti nakariri ti biktima a trabahador ket isu ti naudi a simrek iti parlor.
Iti agdama, agtultuloy ti imbestigasyon dagiti otoridad tapno mabigbig ti suspek ken no anya ti motibo ti pammagkong.
Immapela met ti hepe kadagiti indibidwal nga adda ti ammo na iti napasamak a pammagkong a tumulong tapno alisto a masolbar ti kaso ken mabigbig ti suspek.
