LAOAG CITY – Nagballigi ti inyuswat a search operation ti Philippine National Police iti Barangay Agaga iti ili ti Burgos.
Nabigbig ti subject ti operasyon nga agtawen ti 47, mannalon ken residente iti nadakamat a barangay.
Ti search warrant ket inpatungpal ni Judge Charles Javier Calapini iti Presiding Judge iti Regional Trial Court iti Branch 19, Bangui, Ilocos Norte.
Iti panagsukimat iti balay ti subject ti operasyon ket nakakumpiskar dagiti otoridad ti maysa a caliber 22 nga addaan ti magazine ken tallo a bala, maysa a 12 gauge shotgun ken 7 a pedaso a bala na, kasta pay ti 51 bala ti caliber 22.
Iti agdama, nagtalinaed ti subject ti operasyon iti Philippine National Police iti ili ti Burgos ken sumango iti kaso a panaglabsing ti Republic Act 10591 wenno Comprehensive Firearms and Ammunition Regulation Act.
