LAOAG CITY – Inbutaktak ni Senate Pro Tempore ken blue ribbon committee chair Panfilo “Ping” Lacson nga adda ti maysa a senador a nakisarita kadagiti pada da a kameng ti senado tapno saan nga agpirma iti flood control report.
Immunan nga inrakurak ni Lacson a tallo laengen a pirma ti kasapuan da tapno maisumitir iti plenary ti partial report ti imbestigasyon iti flood control.
Segun ken ni Lacson, ti nasao nga impormasyon ket manipod ken ni Senate President Vicente Sotto III, a tumultulong iti panagala ti nayun a suporta para iti report.
Inpakaammo ni Lacson nga adda ti nakasarita ni Sotto a pada da metlaeng a senador a nangidanun kenkuana a kinasarita isuda ti maysa a senador manipod iti minority bloc a saan da nga agpirma iti flood control report.
Nupay kasta, saanen a nainaganan ti madakdakamat a senador manipod iti minority bloc.
Karaman kadagiti senador a manipod iti minority bloc ket isuda Alan Peter Cayetano, Francis Escudero, Imee Marcos, Ronald Dela Rosa, Bong Go, Joel Villanueva, Robin Padilla, Rodante Marcoleta, ken Jinggoy Estrada.
Naamoan a nakapirman iti flood control report da Sotto, Lacson, Vice chair Erwin Tulfo, ken da senador Bam Aquino, Kiko Pangilinan, ken Risa Hontiveros.
Napalubusan met ni Sotto nga agpirma kas Senate President uray saan a miyembro ti panel.
Inadmitir ni Lacson a nadismaya iti napasamak ngem maawatan na ti sitwasyon dagiti kakadwa na iti senado.
Mangnamnama ni Lacson a mabalin nga agbaliw pay ti panunot ti dadduma a senador aglalo ket naarestaren ni dati nga Ako Bicol Partylist Rep. Zaldy Co idiay Prague a mabalin a mangpadagsen ti desisyon no biruken ti kinapudno iti isyu.
Inpaganetget ni Lacson, a napateg ti panagpirma ti report tapno maipasa daytoy iti plenaryo, no sadinno a mabalin daytoy nga amendaran wenno tingitingen dagiti senador.
Nasuspenso paylaeng ti imbestigasyon iti flood control agingga a maisumitir ti partial report iti plenaryo.
