LAOAG CITY – Nagtalinaed iti kustodyar ti PNP-Paoay ni Barangay Chairman Jones Quevedo iti Barangay Sangladan iti ili a Paoay.
Segun ken ni Police Senior Inspector Eddie Suyat, ti chief of police iti ili a Paoay, boluntaryo a napan insuko ni Quevedo ti paltog na a maysa a kalibre 40.
Immunan nga inbatad ni Quevedo ti panangpalto-paltog kenkuana ti nasabat na a maysa a nakakurung-kurong bayat ti panangiturong na met ti kotse na.
Nupay kasta, iti inyuswat a naun-uneg nga imbestigasyon dagiti otoridad, rumrumuar a nakipinnaltog ti kapitan iti nasabat na a kurung-kurung gapu ta nakumpirmaran a dagiti 22 a kapsula a narekobre iti lugar ket kapsula manipod iti kalibre 9mm ken kalibre 40 a paltog.
Inbatad ni Suyat a possible a mapilaan ni Quevedo ti kaso a panagsalungasing iti Comelec Omnibus Code uray adda ti lisensya na ti paltog na.
Nagtalinaed ti kapitan iti kwerpo ti pulisya tapno maalaan iti palawag no apay a nagpap-paputok ti paltog.
Kabayatanna, inbilin metten ni Provincial Director Police Senior Supt. Cesar Pasiwen ti pannakaimbestigar a naimbag ti nasao a pasamak.
