LAOAG CITY – Nangiparuk-at ti update ti International Criminal Court (ICC) mainaig iti sitwasyon ni dati a Presidente Rodrigo Duterte kabayatan a nakabalud idiay The Hague.
Basar iti International Criminal Court Registry, ni Duterte ket maibilang nga “elderly detained person” nga adda ti nangato a risgo ti pannakatnag isut gapuna nga adda iti babaen ti continuous cell monitoring.
Inlawlawag ti International Criminal Court nga adda dagiti gundaway a naitakleb ni Duterte ngem dagus met a matulungan ti custody staff ken maitawag iti medikal a panangtingiting.
Dinakamat pay ti International Criminal Court nga awan pay ti nairekord nga insidente ti pannakatnag ti dati a presidente iti napalabas a 30 nga aldaw.
Innayon ti International Criminal Cour a naisayangkat dagiti kasapulan nga adjustments iti selda na ken dagiti kagamitan ti dati a presidente tapno masigurado ti kinatalged ken makaaliwaksay daytoy.
Nupay kasta, awan ti naipaay a detalye kadagiti chronic ailments ti dati a presidente gapu iti medical confidentiality.
Ni Duterte, agtawen ti 81 ket sumangsango kadagiti kaso a crimes against humanity mainaig iti war on drugs ken maipagarop a Davao Death Squad.
Idi laeng Abril 23, 2026, kinumpirmaran ti International Criminal Court dagiti kaso kontra kenkuana, karaman ti murder ken attempted murder.
Ti update manipod iti International Criminal Court ket gagem na nga ipakita nga agtultuloy a banbantayan da ti salun-at ken kinatalged ti dati a presidente kabayatan ti panagtultuloy a pannagna ti kaso na.
