LAOAG CITY – Dead on arrival ti maysa nga ama kalpasan a napaltupaltugan iti paset ti Brgy. 4-Marcos iti ili ti Banna.
Basar iti inisyal nga imbestigasyon ti PNP-Banna, napan sinukon ti biktima a ni Jamerson Agamata y Calano, agtawen ti 53 ti balasang na a ni Angelina Agamata y Coloma, agtawen ti 20, agpapaay iti maysa a botika ken agpada dagitoy a residente iti Brgy. Nagpatayan iti nasao nga ili.
Nu pay kasta, bayat a daldalyasaten dagiti agama ti Banna-Pinili Road a paset ti Brgy. 4 ket dita a kellaat a pinaltupaltugan dagiti dua a saan pay a mabigbig a lallaki a nakalugan ti motorsiklo ti ama nga Agamata.
Nagsagaba ti innem a tama ti bala ti ama nga Agamata nu sadinno a lima ti timmama iti barukong ken maysa iti abaga na.
Insegidda a naitaray daytoy iti Banna RHU ngem naideklarar a dead on arrival.
Kabayatanna, nagsagaba laeng ti gasgas iti nagduduma a paset ti bagi ti anak na.
Iti agdama ket manarimaan ti naiget nga imbestigasyon dagiti otoridad ken ti hot pursuit operation kadagiti nakalibas a suspek.
