Local news – Balligi a naarestar ti maysa nga indibidual iti naisayangkat nga Anti-Illegal Drug Buy-Bust Operation iti Brgy. Pias Sur, iti ili ti Currimao.
Nabigbig ti suspek a ni Levi Amodia II y Cabillon, agtawen ti 24, awanan asawa, Construction worker, residente iti Brgy. La Filipina, City of Tagum, Davao Del Norte ngem temporario nga agnanaed iti Brgy. Pias Sur iti ili ti Currimao.
Nakumpiskar manipud iti suspek ti dua nga heat-sealed transparent plastic sachet a naglaon ti maipagarup a shabu ken agdagsen ti 0.0356 a gramo iti babaen ti panagilako na daytoy iti nagpammarang a pulis poseur-buyer ken aggatad daytoy iti sangaribu a pisos.
Malaksid iti dayta ket nakaala pay dagiti pulis ti maysa a sachet a naglaon ti maipagarup a shabu kabayatan a kinapkapan da ti suspek, sangaribu a pisos a nausar kas buy-bust money, Php 2,561.00 a personal a kuarta ti suspek, tallo nga Identification Card, vape, ken cellphone.
Kabayatanna, dimmalan metten iti physical and medical examination ti suspek ken nagatalinaed iti kustodiar ti Philippine National Police iti ili ti Currimao para iti proper disposition.
