LAOAG CITY – Maisagsaganan ti maipila a reklamo a panagsalungasing iti RA 9165 wenno Comprehensive Dangerous Drugs Act of 2002 kontra iti mekaniko a natiliw babaen ti buy bust operation a naiyuswat iti Brgy. Bingao iti ili ti San Nicolas.
Nabigbig ti suspek a ni Anthony Estabillo, agtawen ti 30 ken residente iti Brgy. Bungon iti siudad ti Batac.
Narekobre dagiti otoridad ti maysa a sachet a naglaon ti maipagarup a shabu, ken maysa a kalibre 38 a paltog, uppat a bala ken maysa a kapsula.
Naglikudan met ti suspek a kukua na dagiti narekobre dagiti otoridad.
Inlawlawag ni Estabillo a naggapu da iti talyer nga immuna ken napan da iti Brgy. Nanguyudan iti ili ti Paoay tapno agsingir iti nagpaubra ti lugan ken napan dan iti Brgy. Bingao a nakalugan daytoy iti motorsiklo idinto a dagiti kakadua na a tallo agraman ti boss na ket nakalugan iti kurong-kurong.
Kuna na a mapan da kuma agpakan kadagiti taraken ti boss na idi ta kemmegen dagiti otoridad daytoy.
Kuna na a nadanun na pay a nakapakleb ti maysa a kadua na idi nakasangpet da iti nasao a lugar.
Inbatad ni Estabillo a kinaot dagiti otoridad ti bulsa na ken naalda da ti cellphone ken ti kuarta na.
Mainaig iti daytoy, pinagtalaw dagiti police dagiti kakadua na.
Kabayatanna, inadmitir ni Estabillo nga adda ti dati a kaso na mainaig iti iligal a druga idi tawen 2012 ken tawen 2017.
Innayon na a naacquit ti kaso na idi 2017 ngem ti kaso na idi tawen 2012 ket nakaprobation.
