LAOAG CITY – Natay ti maysa a menor de edad a lalaki kalpasan a nalmes iti Bongo River iti Brgy. Medina iti ili ti Dingras.
Ti biktima ket agtawen ti 13 ken residente iti Brgy. Sulquiano iti ili ti Dingras.
Basar iti Philippine National Police, iti oras ti alas-5:30 ti malem idi kalman, Abril 2, nagturong ti biktima ken dagiti papagayam na iti karayan tapno mapanda agdidigos.
Naamoan a kabayatan ti panagdidigus da ket napan ti biktima iti adalem a paset ti karayan ken saanen a limmung-aw pay.
Gapu iti daytoy, dagus a nagkiddaw ti tulong dagiti kakadwa na, ken maysa kadagiti nakakita iti insidente ti nagresponde nga insigida no sadinno a nakita na ti biktima iti uneg ti danom.
Maysa met kadagiti adda metlaeng iti lugar a nagpabigbig kas mangisursuro ken nagsanay iti Basic Life Support (BLS) and First Aid, ti nangiyuswat ti Cardiopulmonary Resuscitation (CPR) iti biktima.
Iti panagresponde dagiti kameng ti Municipal Disaster Risk Reduction and Management Office ket insigida da nga intaray ti biktima iti Dingras District Hospital (DDH) para iti naan-anay a pannakataming na ngem naideklarar a pimmusayen babaen iti attending physician a ni Dr. Catherine Gamit Damaso gapu iti pannakalmes.
