LAOAG CITY – Kinumpiramaran ni Mr. June Miguel, mangidadaulo iti Laoag City Public Market and Commercial Complex a bimmasit ti mapaspastrekan ti merkado publiko iti binulan kalpasan nga insardengda ti panagsingir kadagiti mapan agpuesto iti night market iti tunggal rabii.
Immunan iti daytoy, ket naipasardeng ti panagsingrida gapu iti pannangipakaammo ni Sangguniang Panlungsod Member Jason Perera a saan a mabalin a paupaan ti maysa a pampubliko a lugar bayat ti naisayangkat a budget hearing ditoy siudad ti Laoag iti biang ti konseho.
Mainaig iti daytoy, dumanon ti P400,000 iti kada bulan ti mapukpukaw a mapaspastrekan ti merkado publiko.
Segun ken ni Sangguniang Panlungsod member Jeff Fariñas, chairman iti Appropriations and Finance ditoy siudad a mangilungalongda a ti laengen mapan agpuesto iti night market ket dagiti adda ti puestona iti merkado publiko.
Kabayatanna, manamnama a mapagsasaritaan daytoy a banag inton sumaron a pannakaisayangkat ti budget hearing.
