LAOAG CITY – Inparit ti Taliban, Afghanistan government ti mixed martial arts (MMA), gapu ta patien da a saan a maitunos daytoy iti linteg ti Islam.
Kinuna ti maysa nga opisial manipud iti sports authority ti Taliban, naranggas unay ti mixed martial arts ken mabalin a mangitunda ti ipapatay.
Ti bilin ket inpasa ti Afghanistan’s morality police iti Ministry for the Propagation of Virtue and the Prevention of Vice iti Taliban.
Dautoy ket kalpasan ti imbestigasion maipapan iti saan nga umno a panagtungpal ti isport iti linteg ti Islam, wenno Sharia.
Kinuna ti Taliban’s General Directorate on Physical Education and Sport iti maysa a statement, natakuatan a ti isport ket agsalungasing iti panagraem iti Sharia ken adu kadagiti aspeto na ti maikontra kadagiti sursuro ti Islam, isu a napagdesisyonan laengen nga iparit mixed martial arts iti lugar da.
Ti mixed martial arts ket maysa a nalatak nga isport kadagiti agtutubo idiay Afghanistan, nabuangay daytoy iti babaen ti Mixed Martial Arts Federation idi 2008, idinto a ti Afghanistan Fighting Championship (AFC) ken Truly Grand Fighting Championship (TGFC) ket nangangay iti pinulpullon a laban.
