LAOAG CITY – Natay ti driver ti motorsiklo kalpasan ti panagdinnungparda iti maysa a kotse iti Brgy. 30-B, Sta. Maria ditoy siudad ti Laoag.
Basar iti Laoag City Police Station, nabigbig ti nangiturong ti motorsiklo a Suzuki Raider FU150 a ni Resan Paez y Baldosano, agtawen iti 48 ken residente ti Brgy. 30, Baoa West iti siudad ti Batac ken nabigbig met ti driver ti kotse a Toyota Corolla Model 2005 a ni Willy Ray Cadavona y Valdez, agtawen iti 32 ken residente ti Brgy. 16, Suba iti ili ti Paoay.
Maibasar iti inwayat nga imbestigasion dagiti otoridad, kabayatan a dumaldalyasat ti kotse nga agpa-abagatan ket maipagarup nga immagaw iti linya ti kalsada ti nakamotorsiklo nga agpa-amianan.
Gapu iti daytoy, nagdinnungpar dagiti dua a lugan no sadinno naitaray iti Governor Roque B. Ablan Sr. Memorial Hospital ti driver ti nakamotorsiklo idinto a naikabil met iti Karmelli Hospital ti nangiturong iti kotse.
Kabayatanna, naammoan a nakasuot ti protective helmet ken reflectorized vest ti nakamotorsiklo idi napasamak ti desgrasia.
Iti agdama, agtultuloy pay laeng ti maiwaywayat nga imbestigasion maipapan iti napasamak nga insidente.
