LAOAG CITY – Naawaten ti bayad dagiti pito nga agtagikua ti lote a nadalapos iti expansion ti Laoag International Airport (LIA) ditoy ciudad ti Laoag.
Dagitoy ket sumagmamano laeng manipod iti nasurok tallo gasut nga agtagikua kadagiti naapektaran ti lotena gapu ta dagitoy ti nakakompleton ti kasapulan a dokumento.
Naamoan nga adda pay ti sumaruno a 15 a makaawat ti bayad ti lotena.
Inbatad ni Mrs. Evalaudia Duyor, Officer In-charge ti Provincial Assessor’s Office a kalikagom da a mabayadan aminen dagiti akinkikua iti lote ngem awan ti maaramidan da gapu ta saan met pay a nakumpleto dagiti papeles dagiti maseknan.
Inpakaammo ni Duyor a ti nasken nga isumitir dagiti maseknan ket ti titulo ti daga a nainagan kadakuada.
Kabayatanna, inbatad na a ti nailatang a pondo para iti umuna a bansada dagiti mabayadan ti lotena ket 128 a milyon a pisos nga isu ti agdama a maibaybayad.
Innayon na a ti maikadua a bansada ket umab-abot iti 900 a milyon a pisos.
Maipalagip a limapulo a porsiento iti bayad dagiti lote ti umun-una a maipaima kadagiti agtagikua ken ti kaguduana ket maiyawat apaman a maiyakar ti titulo iti babaen ti nagan ti Department of Transportation.
