LAOAG CITY – Manarimaan ti panagimbestigar ti NAPOLCOM wenno National Police Commission kontra kadagiti tallo a pulis iti ili ti Pasuquin gapu iti maipagarup a panangdangran ken panangtutukda ti paltog kadagiti residente a nagkamang iti kuerpo ti pulisia.
Daytoy ti imbatad ni Police Col. Frederick Obar, ti Provincial Director iti Ilocos Norte Police Provincial Office.
Segun kenkuana, ti National Police Commission ti agim- imbestigar gapu ta isu iti akin-sakop ti kaso a Grave Offense kontra kadagiti tallo a pulis iti nadakamat nga ili.
Nupay kasta, kuna ni Obar nga adda ti inpila da a kaso a simple neglect of duty gapu ta nakita ti video a saan da a nakauniporme.
Maipalagip nga adda ti naipatulod a video ditoy Bombo Radyo Laoag a pakabuyaan ti saan a napintas a panangakomodar dagiti tallo a pulis kadagiti sumagmamano nga indibidual a nagkamang iti kuerpo ti pulisia tapno agpatulong kadakuada.
