LAOAG CITY – Nasurok 20 a tattao ti naka-close contact ni IN-C5 wenno ti maikalima a kumpirmado a nagpositibo ti covid-19 a taga Barangay Duripes iti ili ti Bacarra.
Segun kenni Dr. Rhina Corpuz, ti covid-19 consultant, manamnama a dumalan iti swab test wenno PCR-test dagiti indibidwal intono bigat.
Karaman pay kadagiti dumalan iti swab test ket dagiti health care workers ken dagiti kameng ti pulisya a nangsukon kenkuana iti border iti ili ti Badoc.
Maipalagip a simmangpet ni IN-C5 ken dagiti kakadwa na iti bus babaen ti Balik Probinsya Program idi Hunyo 29 ken na-swab test sakbay a nagpasngay.
Kabayatanna, kinumpirmaran ni Police Major Rommel Ramos, ti chief of police ti PNP-Bacarra nga adda ti maideploy a dua a kameng ti pulisya iti Barnagay Duripes iti nasao nga ili.
Daytoy ket kalpasan ti pannakaipatungpal ti lockdown iti nadakamat a barangay gapo iti panagpositibo ti maysa a residente iti covid-19.
Segun kenni Ramos, dagiti dua a pulis ket tumulong kadagiti opsiyal a mangipaay ti seguridad bayat a naka-lockdown ti barangay ken agbantay.
Inbatad na a maymaysa ti entrance ken exit ti nasao a barangay gapo ta amin a mabalin a pagserkan wenno pagruwaran ket nabarikadaan.
Kunana a dagiti maibilang nga APOR ket mapalubusan a rumwar ngem masapol a mangipresentar dagitoyti certificate of employment wenno ID.
