LAOAG CITY – Balligi a naisayangkat ti Anti-Illegal Drug Buy-bust Operation iti ili ti Paoay.
Daytoy ket babaen iti nagtipon a puersa ti Philippine National Police iti ili ti Paoay ken Philippine Drug Enforcement Unit.
Nabigbig ti suspek a ni Ringlito Saducos alyas Anjo, agtawen iti 42, naasawaan, driver ken residente ti Brgy. Upon iti ili ti Pinili.
Basar iti imbestigasion, natiliw ti suspek kalpasan a maipagarup a naglako ti maysa nga heat sealed transparent plastic sachet a naglaon ti maatap a shabu iti maysa a pulis a nagpammarang kas poseur-buyer.
Malaksid iti daytoy, naala pay manipud iti suspek ti 11 nga heat sealed transparent plastic sachet a naglaon ti maipagarup a shabu pakairamanan ti maysa a ribu a pisos a mapapati a nausar kas buy-bust money iti operasion.
Naammoan nga agbalor iti 6,800 a pisos dagiti naala a kontrabando manipud iti suspek.
Maibasar kadagiti otoridad, maibilang ti suspek kas Newly Identified Drug Pusher iti ili ti Paoay.
Kabayatanna, manamnama a mapilaan ti kaso ti suspek gapu iti panaglabsingna iti Republic Act No. 9165 wenno ti Comprehensive Dangerous Drugs Act.
