LAOAG CITY – Naarestar iti entrapment operation nga insayangkat ti National Bureau of Investigation (NBI) ti maysa nga online seller gapu iti panaglako na ti overpriced nga alcohol iti ili ti Pasuquin.
Binigbig ni Atty. Diosdado Araos, ti mangidadaulo iti NBI ditoy probinsya ti suspek a ni Jeffrey Cuepo, residente iti Barangay Poblacion iti ili ti Pasuquin.
Inbatad ni Araos a dua nga aldaw laeng a nakitransaksyon da ken ni Cuepo babaen iti facebook ken text messages.
Inpakaammo na a nakakumpiskar da ti 30 a litro nga alcohol iti ikot ti suspek ken maibilang a nangina unay ti panaglako na gapu ta umabot ti 280 a pisos ti kada litro.
Inlawlawag na a basar iti Department of Trade and Industry (DTI ken dagiti parmacia ket umabot laeng ti 140 agingga iti 160 a pisos ti presyo ti kada litro nga alcohol.
Naipila a dagus ti reklamo kontra iti nasao a suspek.
