LAOAG CITY – Saan a nagbalin a lapped dagiti minilyon a tattao a nagbuya ti pormal a pananglukat ti 2024 Paris Olympics.
Nangitugot ti payong ken kapote ti kaadduan tapno maimatangan ti naisangsangayan ken naidumduma a pananglukat ti Olympics a maiyus-uswat iti River Seine.
Saan nga iti kas kadagiti nakadawyanen nga stadium daytoy a maisaysayangkat ngem ita ket iti River Seine no sadino a nakalugan kadagiti bangka dagiti makipaset kabayatan ti parada.
Agkaabay da French President Emmanuel Macron ken International Olympic Committee (IOC) President Thomas Bach tapno buyaen ti parada.
Kas ti tradision ket umuna ti parada ti panangiparada ti Olympic Torch a sinaruno ti barko ti Greece gapu ta idiay a nangrugi ti Olympics.
Dumanon iti 10,500 dagiti atleta ti Greece nga indauloan da NBA superstar Giannis Antetokounmpo ken two-time Olympian race walk Antigoni Ntrismpioti.
Pinaaweng ti kampana iti kaunaan a gundaway ti Norte-Dame de Paris Cathedral.
Daytoy ti umuna a gundaway a nagaweng ti kampana sipod idi nauram idi Abril 2019.
Indauloan met ti singer a ni Lady Gaga iti panagkanta iti Opening ceremony.
Kinantana ti “Mon truc en plumes” ti iconic French artist Zizi Jeanmaire.
Simmaruno met a nagkanta ti agtawen iti 28 a singer a ni Aya Nakamura.
Naammoan a sumagmamano kadagiti nag-perform ket dagiti nalalatak a modelo no sadino mabigbigbig ti Paris kadagiti nagduduma a fashion.
