LAOAG CITY – Nangiparuk-at ti statement ti Office of the Vice President (OVP) mainaig kadagiti rumrumuar a report maipanggep iti saan a natuloy a panagdengngeg iti nailungalong a pondo da para intono 2026.
Basar iti Office of the Vice President, ti Kamara de representantes ti nagkedked iti delegasyon nga indaulwan ti maysa nga Assistant Secretary.
Nupay senior official daytoy kas presidential appointee, inpetteng ti Kamara de representantes a masapol a maysa nga Undersecretary ti nagatendar kas maiyataday iti tradisyon.
Maipalagip nga iti oras ti alas-10:07 ti bigat idi Setyembre 12, inpakaammo ti budget sponsor a ti Bise Presidente ti mismo nga agatendar iti panagdengeg kas kasukat ti Undersecretary.
Imbes nga ituloy ti panagdengngeg ket pinili ti sponsor nga itantan laengen daytoy.
Nabilin met ti Office of the Vice President delegation, karaman ti bise presidente a saanen nga agtuloy iti kamara de representantes.
Inlawlawag ti nasao nga opisina a nakasagana da nga agatendar ken ikalintegan ti budget da iti umiso a forum.
Innayon da nga agtultuloy ti panangrespetar da iti proseso ti kongreso ken mangnamnama a mailawlawag ti nailungalong a pondo da iti sumaruno a panagdengngeg.
