LAOAG CITY – Nangrugin nga ilako ti gobierno ti P29 iti kada kilo ti bagas kadagiti Kadiwa stores kadagiti sumagmamano a pangopisinaan ti National Irrigation Administration (NIA).
Segun ken ni National Irrigation Administration Administrator Eduardo Guillen, manamnama a maiyuswat inton sumaruno a lawas ti programa iti P29 iti kada kilo ti bagas kadagiti Kadiwa Centers tapno ad-adu pay a konsumer manipud kadagiti nadakamat a sektor ti makagatang.
Inbatad ni Guillen ken Agriculture Secretary Francisco Tiu Laurel Jr., limitado laeng iti 10 a kilo ti bagas iti kada konsumer ti maipalubos tapno ad-adu pay ti mabenepisiaran ti nasao a P29 iti kada kilo ti bagas.
Naammoan a kaap-apit dagiti bagas a mailako no sadinno naimas ken napintas ti klasena.
Inadmitir met ti opisial a ti nangato a presio ti bagas ket maysa kadagiti dakkel a karit iti gobierno nangruna kadagiti surveys ket rumrummuar a nangato pay laeng ti inflation iti pagilian.
Immunan nga inbatad ni Laurel a ti panaglako ti bagas iti balor a P29 iti kada kilo ket maysa a long term program ti administrasion ni Presidente Ferdinand Marcos Jr.
