LAOAG CITY – Saan a maawat ti pamilya Castillo iti pannakaipila pay laeng ti kaso a murder kontra iti miembro ti pamilya da a natay kalpasan a pinalto-paltogan ti riding in tandem suspect.
Daytoy ti reaksiyon ni Mr. Christian Castillo, residente iti Brgy. Guerero iti ili ti Dingras ken kabsat ti naitudo a suspek ti pammaltog iti ili ti Sarrat.
Naluksaw ni Castillo gapu ta napabasol pay laeng ti manong na nupay natayen a naitudo suspek ti pammaltog iti ili ti Sarrat a nakatayan ni Rodante Corrales.
Inpetteng na a saan a maaramid ti manong na iti pumatay ken nasingpet idi sibibiag daytoy.
Nupay kasta, saan unay a naamuan ni Castillo dagiti aktibidades ti manong na gapu ta saan nga agaw-awid iti pagtaengan iti Brgy. Guerero, Dingras.
Innayon ni Castillo a pammerperdi laeng iti manong na ti pannakaipila ti murder.
Naamuan met ti Bombo Radyo Laoag nga awan ti record na iti barangay gapu ta kuna pay dagiti sumagmamano nga opisyal ti barangay a nasingpet ti biktima.
