LAOAG CITY – Patien ti pamilya ni Brgy. Kagawad Albino Licuan iti Barangay Susugaen iti ili ti Pasuquin a ti bakuna kontra covid-19 ti rason ti pannakatay ti opisyal.
Segun kenni Mr. Larry Licuan, ti kabsat ti kagawad, sakbay a nagpabakuna ti kabsat na ket napigsa pay laeng ti opisyal ngem idi nagbakuna ket isu ti maipagarop a panangrugi ti panagkapsot ti bagi na.
Inpetteng na na nga idi Martes, napan isuna iti balay ti kagawad ken ditoy a naibaga ti kabsat na kenkuana nga agkakapsoten ti bagi na gapo iti panagbakuna na.
Inlawlawag na nga idi Huwebes, Mayo 27 ket naitaray ti kagawad iti Mariano Marcos Memorial Hospital and Medical Center iti ciudad ti Batac ken idi laeng kalman ket pimmusay daytoy.
Mainaig iti daytoy, inbatad ni Mr. Mark Vynne Jed Licuan, anak ni Kagawad Licuan a basar iti cadaver tag ket Acute Respiratory Failure ti rason ti nakatayan ti ama na.
Inbatad na a saan na a nakasarita ti doktor gapo iti pannakumikom na ken panagladingit na.
Ummuna iti daytoy, kunana a kalpasan a nagbakuna ti ama na arig na kanayon a mabanbannog ken agid-idda latta.
Kabayatanna, nagpanawagan ti pamilya Licuan iti gobierno probinsyal a makita a nalaing wenno masigurado a natalged ti bakuna.
